पहाडी लावण्यभूमी: भूतान

टायगर्स नेस्ट म्हणजेच तक्तसांग मोनॅस्टरी. तिथली एक आख्यायिका अशी की, गुरू पद्मसंभवा (म्हणजेच गुरु रिंपोचे), ज्यांनी आठव्या शतकात भूतानमध्ये बौद्ध धर्म प्रथम आणला, त्यांनी एकदा या ठिकाणी बसून ध्यानधारणा केली. ती त्यांनी केली तीन वर्षं, तीन महिने, तीन आठवडे, तीन दिवस आणि तीन तास. गुरू इथं आले, ते तिबेटमधून, वाघिणीच्या पाठीवर बसून उडत-उडत! या सगळ्यामुळे हे स्थान पवित्र झालं. सतराव्या शतकात या ठिकाणी मंदिराचं बांधकाम झालं. अत्यंत पवित्र असल्यानं हा पर्वत चढून त्या ठिकाणाचं दर्शन एकदातरी घ्यावं ही भूतानी लोकांची मनीषा असते. आम्ही डोंगर चढत असताना एक स्त्री आपल्या वयस्कर वडिलांना घेऊन आली होती. आयुष्यात एकदातरी ‘तक्तसांग’ला जाण्याची त्यांची इच्छा पूर्ण होत होती. ते समाधान त्यांच्या सुरकुतलेल्या भावविहीन चेहऱ्यावरही जाणवत होतं.

Advertisements